امبارح دخلت مدونه لاحد الاصدقاء واستوقفنى فيها خبر بصراحه ملانى حزن لحد دلوقتى مش بس ملانى حزن ده يمكن كمان خلانى معرفش انام طول الليل 00قريت خبر وفاه فتاه من اصحاب المدونات اسمها داليا عز ومعرفش ليه لماقريت الخبر حزنت عليها كده مع انى حتى معرفهاش ولما قريت الخبر الفضول اخدنى لانى افتح مدونتها واقرا فيها ياترى دى كانت بتكتب ايه وعن مين ولما فتحت لقيت ادامى بس التعزيات اللى كانت موجهه ليها واستوقفنى احد اصدقاءها بيقول فى نعيه يارب كل اللى كانت بتكتبه يكون فى ميزان حسناتها وينفع الاخرين بعد وفاتهاوهنا حسيت بالذعر وحسيت قد ايه ان الكتابه فى مدونه زى دى مسئوليه جامده جدا ادام ربنا ومن هنا حسيت ان دى رساله من ربنا موجهه ليا وانا فى بدايه مدونتى ان كل اللى هكتبه لازم يكون ان شاءالله فى ميزان حسناتى مش غير كده يعنى لازم اراقب كل كلمه بتخرج منى عشان الكلام ده هيكون يأما ليا او عليا وربنا هيحاسبنى عليه ومحدش عارف امتى معاده ودعيت ربنا يستر ويراقبنى هو ويوجهنى هو بعظمته من غير مانا اشعر لانه هو خير عون لكل البشر
انا حقيقى ملحقتش اقرا حاجه من اللى هى كاتباه لان الكلام ده وقفنى ومكملتش قرايه بس ان شاءالله هقرالها وادعيلها بالرحمه والمغفره ارجوكم ادعولها بالرحمه وان ربنا يغفرلها ويغفرلنا جميعا ذنوبنا مفيش انسان خالى00وارجوكم ادعولى انا كمان ان ربنا يجعل كل كلمه اكتبها فى ميزان حسناتى 00امين يارب العالمين